काठमाडौं । मेटाका प्रमुख कार्यकारी अधिकृत (सीईओ) मार्क जुकरबर्गले कम्पनीलाई कृत्रिम बुद्धिमत्ता (एआई) केन्द्रित संरचनामा रूपान्तरण गर्ने क्रममा केही गल्तीहरू भएको स्वीकार गरेका छन्। कम्पनीभित्र प्रसारित एक आन्तरिक मेमोमा उनले परिवर्तनको जटिलताका कारण त्रुटिहरू भएको र भविष्यमा पनि यस्ता चुनौतीहरू आउन सक्ने उल्लेख गरेका हुन्।
रोयटर्सले प्राप्त गरेको उक्त मेमोअनुसार जुकरबर्गले मेटाको कार्यप्रणालीलाई एआई अनुकूल बनाउन कम्पनीले अर्बौं डलर लगानी गरिरहेको बताएका छन्। एआई क्षेत्रमा तीव्र गतिमा भइरहेको विकास र त्यसले सिर्जना गरेका चुनौतीहरूबारे चर्चा गर्दै उनले परिवर्तनको प्रक्रियामा गल्तीहरू अपरिहार्य रहेको स्वीकार गरेका छन्।
उनले आगामी साङ्गठनिक परिवर्तनहरूमा कर्मचारीहरूलाई सकेसम्म स्थिरता प्रदान गर्न कम्पनी प्रतिबद्ध रहेको बताए। यद्यपि, विश्वव्यापी प्रविधि क्षेत्रको तीव्र परिवर्तन आफ्नो नियन्त्रणभन्दा बाहिर रहेकाले पूरा गर्न नसकिने वाचा नगर्ने पनि स्पष्ट पारे।
यसअघि मेटाले गत मे महिनामा व्यापक पुनर्संरचना गर्दै विश्वभरका करिब १० प्रतिशत कर्मचारी कटौती गरेको थियो। साथै, ७ हजार कर्मचारीलाई एआईसम्बन्धी नयाँ जिम्मेवारीमा स्थानान्तरण गरिएको थियो।
जुकरबर्गका अनुसार एआई मोडलको प्रशिक्षण तथा अन्य नयाँ जिम्मेवारीमा खटाइएका कर्मचारीहरूका लागि उपयुक्त भूमिका सुनिश्चित गर्ने प्रयास जारी रहनेछ। उनले यस वर्ष कम्पनीस्तरमा थप राष्ट्रिय वा विश्वव्यापी कर्मचारी कटौती नगर्ने आश्वासन पनि दिएका छन्।
कम्पनीले व्यवस्थापकहरूको जिम्मेवारी अत्यधिक बढेको गुनासोलाई सम्बोधन गर्दै उनीहरूको सुपरिवेक्षण दायरा केही घटाउने योजना बनाएको छ। यसअघि मेटाको ‘अप्लाइड एआई इन्जिनियरिङ’ इकाइमा ५० कर्मचारी बराबर एक जना मात्र व्यवस्थापक रहने संरचना लागू गरिएको जानकारी सार्वजनिक भएको थियो।
कर्मचारीबीच सहकार्य र सम्बन्ध सुदृढ बनाउन मेटाले कर्पोरेट कार्यक्रम तथा आन्तरिक गतिविधिका लागि बजेट वृद्धि गर्ने तयारी गरेको छ। सोही योजनाअन्तर्गत आगामी जुलाईमा ठूलो स्तरको ‘ह्याकाथन’ आयोजना गरिने जुकरबर्गले जानकारी दिएका छन्।
एआई पूर्वाधार विस्तारलाई प्राथमिकता दिँदै मेटाले गत अप्रिलमा आफ्नो वार्षिक पुँजीगत खर्चको अनुमान बढाएर १२५ अर्बदेखि १४५ अर्ब अमेरिकी डलर पुर्याएको थियो। यद्यपि, उक्त मेमोबारे प्रतिक्रिया माग्दा मेटाले औपचारिक टिप्पणी गर्न अस्वीकार गरेको रोयटर्सले जनाएको छ।
क्याटेगोरी : अन्तराष्ट्रिय
प्रतिक्रिया