चितवन, असार ८ — सत्तारुढ राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनको उद्घाटन सत्र भव्य रूपमा सम्पन्न भएको छ। महाधिवेशनको ऐतिहासिक क्षणमा हजारौं कार्यकर्ता, समर्थक तथा पार्टी प्रतिनिधिहरूको उल्लेखनीय उपस्थिति रहेको थियो।
पार्टी स्थापनाको चौथो वर्ष मनाइरहेको रास्वपाले झण्डै दुई तिहाइ बहुमतसहित सरकारको नेतृत्व गरिरहेको अवस्थामा आयोजना गरेको पहिलो महाधिवेशनलाई विशेष महत्त्वका साथ हेरिएको छ। उद्घाटन समारोहमा प्रधानमन्त्री बालेन्द्र शाह, पार्टी सभापति रवि लामिछाने, केन्द्रीय पदाधिकारी, सांसद तथा विभिन्न राजनीतिक दलका प्रतिनिधिहरूको सहभागिता रहेको थियो।
यद्यपि पार्टीका चर्चित सांसद अमरेशकुमार सिंह भने उद्घाटन समारोहमा अनुपस्थित रहे। सर्लाही–४ बाट निर्वाचित सिंह महाधिवेशनमा सहभागी नभएको उनका स्वकीय सचिव रञ्जित झाले बताएका छन्।
झाका अनुसार सांसद सिंह हाल काठमाडौंमै रहेका छन्। “उहाँ अहिले काठमाडौंमै हुनुहुन्छ। महाधिवेशनमा सहभागी हुनुभएको छैन। किन नआउनुभएको हो भन्नेबारे जानकारी छैन,” उनले भने।
पछिल्लो समय सांसद सिंहले पार्टीभित्र विभिन्न विषयमा फरक धारणा राख्दै आएका छन्। उनले सार्वजनिक रूपमा समेत केही असन्तुष्टि व्यक्त गरेका थिए। संसदमा पनि उनले सरकारको कामकारबाही तथा केही नीतिगत विषयमा आलोचनात्मक धारणा राख्ने गरेका छन्।
उनको अनुपस्थितिलाई लिएर राजनीतिक वृत्तमा विभिन्न अड्कलबाजी भए पनि रास्वपाले यसबारे कुनै औपचारिक प्रतिक्रिया जनाएको छैन। महाधिवेशनको बन्दसत्र सोमबारदेखि सुरु हुँदैछ, जहाँ विधान संशोधन, संगठनात्मक प्रतिवेदन तथा नयाँ नेतृत्व चयनको प्रक्रिया अघि बढाइनेछ।
क्याटेगोरी : राजनीति
प्रतिक्रिया