सातदोबाटो र एकान्तकुनामा अन्डरपास निर्माण हुने, ट्राफिक जाम समाधानतर्फ सरकारको नयाँ पहल
काठमाडौं । काठमाडौं उपत्यकामा बढ्दो सवारी चाप र ट्राफिक जाम व्यवस्थापन गर्न सरकारले आगामी आर्थिक वर्षदेखि सातदोबाटो र एकान्तकुनामा अन्डरपास निर्माण कार्य सुरु गर्ने भएको छ।
सरकारले सडक पूर्वाधार स्तरोन्नति तथा यातायात व्यवस्थापनलाई प्रभावकारी बनाउने लक्ष्यसहित उक्त परियोजनाका लागि १२ करोड ४६ लाख रुपैयाँ बजेट विनियोजन गरेको छ। अन्डरपास निर्माण भएपछि ती क्षेत्रहरूमा दैनिक हुने सवारी साधनको चाप कम हुने, यात्रुहरूको समय बचत हुने तथा ट्राफिक प्रवाह थप सहज बन्ने अपेक्षा गरिएको छ।
सातदोबाटो र एकान्तकुना काठमाडौं उपत्यकाका अत्यधिक व्यस्त चोकमध्ये पर्दछन्। कार्यालय समय तथा बिहान–साँझको व्यस्त समयमा यहाँ लामो ट्राफिक जाम हुने समस्या वर्षौंदेखि रहँदै आएको छ। अन्डरपास निर्माणसँगै सडक सञ्जाललाई आधुनिक र व्यवस्थित बनाउने सरकारी योजनाले गति लिने विश्वास गरिएको छ।
सहरी पूर्वाधार विकास तथा यातायात सुधारलाई प्राथमिकतामा राख्दै सरकारले काठमाडौं उपत्यकाका प्रमुख सडक तथा चोकहरूको दीर्घकालीन समाधानका लागि विभिन्न परियोजना अघि बढाइरहेको जनाएको छ।
विशेषज्ञहरूका अनुसार अन्डरपास निर्माणले ट्राफिक व्यवस्थापनमा सकारात्मक प्रभाव पार्ने भए पनि दीर्घकालीन समाधानका लागि सार्वजनिक यातायातको सुदृढीकरण, सडक विस्तार तथा समग्र शहरी योजनामा समेत ध्यान दिन आवश्यक छ।
क्याटेगोरी : राजनीति
प्रतिक्रिया