काठमाडौं । सरकारको नेतृत्व गरिरहेको राष्ट्रिय स्वतन्त्र पार्टी रास्वपा भित्र नेतृत्व शैली र निर्णय प्रक्रियालाई लिएर आन्तरिक असन्तुष्टि बढ्दै गएको चर्चा राजनीतिक वृत्तमा सुरु भएको छ।
पार्टी सभापति रवि लामिछाने र प्रधानमन्त्री बालेन्द्र शाह बालेन बीच पछिल्लो समय संवाद र कार्यशैलीका विषयमा मतभेद देखिएको दाबी केही नेताहरूले गरेका छन्। यद्यपि पार्टी नेतृत्वले यसबारे औपचारिक धारणा सार्वजनिक गरेको छैन।
पार्टी निकट स्रोतहरूका अनुसार प्रधानमन्त्री शाहको निर्णय शैली, मन्त्री तथा सांसदहरूसँगको समन्वय र संवेदनशील विषयमा सार्वजनिक अभिव्यक्तिलाई लिएर पार्टीभित्र प्रश्न उठ्न थालेका छन्। विशेषगरी प्रतिनिधिसभामा सीमा सम्बन्धी विषयमा प्रधानमन्त्रीले दिएको अभिव्यक्तिपछि रास्वपाभित्र आन्तरिक छलफल तीव्र बनेको बताइन्छ।
प्रधानमन्त्रीको उक्त भनाइपछि संसद्मा प्रमुख प्रतिपक्षी दलले समेत आपत्ति जनाएको थियो भने परराष्ट्र मन्त्रालयले विषयबारे स्पष्टिकरण जारी गरेको थियो। सोही घटनाले पार्टीभित्र नेतृत्वको कूटनीतिक संवेदनशीलता र सार्वजनिक अभिव्यक्तिबारे बहसलाई थप बल दिएको विश्लेषण गरिएको छ।
यता, सभापति रवि लामिछाने भारत भ्रमणका क्रममा भारतीय राजनीतिक नेतृत्वसँग भेटवार्तामा व्यस्त रहेका छन्। भ्रमणपछि पार्टीको केन्द्रीय समिति र संसदीय दलको बैठकमार्फत सरकारको कार्यसम्पादन, बजेट कार्यान्वयन तथा नेतृत्व शैलीबारे समीक्षा हुन सक्ने चर्चा छ।
क्याटेगोरी : राजनीति
प्रतिक्रिया