काठमाडौं । निर्वाचन आयोगले संविधान संशोधनसम्बन्धी सुझाव अन्तर्गत हालको २७५ सदस्यीय प्रतिनिधिसभालाई घटाएर १०५ सदस्यीय बनाउने प्रस्ताव गरेको छ।
आयोगले प्रधानमन्त्री बालेन शाहका राजनीतिक सल्लाहकार असिम शाह नेतृत्वको संविधान संशोधन कार्यदललाई बुझाएको सुझावमा ७७ जना सांसद प्रत्यक्ष निर्वाचन प्रणालीमार्फत प्रत्येक जिल्लाबाट एक–एक जना निर्वाचित हुने तथा बाँकी २८ जना समानुपातिक प्रणालीबाट चयन हुने व्यवस्था गर्न प्रस्ताव गरेको हो।
त्यसैगरी, आयोगले हाल ५९ सदस्य रहेको राष्ट्रिय सभालाई ३० सदस्यीय बनाउन, प्रदेश सभामा समानुपातिक निर्वाचन प्रणाली हटाउन, स्थानीय तहको निर्वाचनलाई गैरदलीय बनाउन तथा संघीय र प्रदेश सरकारमा विषयविज्ञहरूको नेतृत्वमा मन्त्रिपरिषद् गठन गर्न सकिने व्यवस्था गर्न पनि सुझाव दिएको छ।
आयोगका यी प्रस्तावहरू हाल सुझावका रूपमा मात्र रहेका छन्। यस्ता व्यवस्थाहरू कार्यान्वयनमा ल्याउन संविधान संशोधनसँगै प्रमुख राजनीतिक दलहरूबीच व्यापक सहमति आवश्यक पर्नेछ।
संविधान संशोधनसम्बन्धी बहस चलिरहेका बेला निर्वाचन आयोगका यी सुझावहरूले नेपालको राजनीतिक तथा निर्वाचन प्रणालीमा सम्भावित ठूलो परिवर्तनको संकेत गरेका छन्।
क्याटेगोरी : राजनीति
प्रतिक्रिया