इस्कोन मन्दिर प्रकरण : बाल संरक्षणमाथि उठ्यो गम्भीर प्रश्न, प्रिन्सिपल अनुसन्धानको घेरामा
काठमाडौं, असार १ । बुढानीलकण्ठस्थित इस्कोन गुरुकुल आश्रममा बालबालिकामाथि दुर्व्यवहार र यातना दिइएको आरोप सार्वजनिक भएपछि उक्त प्रकरणले नयाँ मोड लिएको छ। आरोपको केन्द्रमा रहेका आश्रमका प्रिन्सिपल सुरजकृष्ण श्रेष्ठलाई प्रहरीले नियन्त्रणमा लिएर अनुसन्धान अगाडि बढाएको स्रोतले जनाएको छ।
बालबालिकाको शिक्षा, संस्कार र संरक्षणको जिम्मेवारी बोकेको संस्थामाथि नै यस्ता आरोप लागेपछि अभिभावक, पूर्वविद्यार्थी तथा सरोकारवालाहरूमा चासो र चिन्ता बढेको छ। आश्रमभित्र अनुशासनको नाममा के कस्ता गतिविधि भइरहेका थिए भन्ने विषय अनुसन्धानको मुख्य केन्द्र बनेको छ।
प्रहरीले प्राप्त उजुरीका आधारमा प्रारम्भिक अनुसन्धान सुरु गरेको जनाएको छ। अनुसन्धानका क्रममा बालबालिका, अभिभावक, कर्मचारी तथा व्यवस्थापन पक्षसँग बयान लिने कार्य भइरहेको बताइएको छ। घटनासँग सम्बन्धित अन्य प्रमाण तथा तथ्यहरू पनि संकलन भइरहेका छन्।
यस घटनाले धार्मिक तथा शैक्षिक संस्थाभित्र बाल संरक्षणका मापदण्ड कत्तिको प्रभावकारी रूपमा कार्यान्वयन भएका छन् भन्ने प्रश्नसमेत उठाएको छ। बाल अधिकारकर्मीहरूका अनुसार कुनै पनि संस्थाको प्रतिष्ठाभन्दा बालबालिकाको सुरक्षा र अधिकार महत्वपूर्ण विषय हो।
सामाजिक सञ्जालमा समेत घटनाको निष्पक्ष छानबिन र दोषीमाथि कानुनी कारबाहीको माग भइरहेको छ। कतिपयले धार्मिक तथा आवासीय शिक्षण संस्थाहरूमा नियमित अनुगमनको आवश्यकता औंल्याएका छन्।
यता, अनुसन्धान जारी रहेकाले घटनाबारे थप विवरण सार्वजनिक गरिएको छैन। सम्बन्धित निकायहरूले सत्यतथ्य बाहिर ल्याउन निष्पक्ष र प्रभावकारी अनुसन्धान गरिने बताएका छन्।
क्याटेगोरी : समाचार
प्रतिक्रिया