काठमाडौं । प्रधानमन्त्री बालेन्द्र शाह (बालेन) नेतृत्वको सरकारले सार्वजनिक सेवामा अनुशासन र जवाफदेहितालाई प्राथमिकतामा राख्दै सरकारी कर्मचारीका लागि कडा आचारसंहिता लागू गरेको छ।
सरकारले कार्यालय समयमा फेसबुक, टिकटक लगायत सामाजिक सञ्जालको अनावश्यक प्रयोगमा रोक लगाएको छ। कार्यसम्पादनमा असर पुग्ने गरी सामाजिक सञ्जालमा समय बिताउने कर्मचारीमाथि निगरानी बढाइएको बताइएको छ।
यस्तै, कार्यालय समयमा समूह बनाएर लामो समयसम्म खाजा तथा गफगाफमा व्यस्त रहने प्रवृत्तिलाई समेत निरुत्साहित गरिएको छ। सेवाग्राहीलाई छिटो र प्रभावकारी सेवा उपलब्ध गराउने उद्देश्यले कर्मचारीलाई आफ्नो जिम्मेवारीप्रति केन्द्रित हुन निर्देशन दिइएको छ।
सरकारले सरकारी सवारी साधनको दुरुपयोग नियन्त्रण गर्न पनि कडा नीति अवलम्बन गरेको छ। सरकारी गाडी निजी काम, पारिवारिक कार्यक्रम वा बिदाको दिन अनधिकृत रूपमा प्रयोग गर्न नपाइने व्यवस्था लागू गरिएको छ।
सरकारको यो कदमलाई सुशासन र सार्वजनिक स्रोतको संरक्षणतर्फको प्रयासका रूपमा हेरिएको छ। यद्यपि केही कर्मचारी वृत्तमा भने पुराना अभ्यासमा अंकुश लगाइएकाले असन्तुष्टि देखिएको चर्चा पनि छ।
सरकार निकट स्रोतका अनुसार, “सार्वजनिक पद सुविधा भोग्नका लागि होइन, सेवा दिनका लागि हो” भन्ने मान्यतालाई व्यवहारमा उतार्ने अभियानअन्तर्गत यी निर्णयहरू कार्यान्वयनमा ल्याइएको हो।
क्याटेगोरी : समाचार
प्रतिक्रिया