चितवन । राष्ट्रिय स्वतन्त्र पार्टी (रास्वपा)ले पार्टी स्थापनाको करिब चार वर्षमै पहिलो राष्ट्रिय महाधिवेशन आजदेखि चितवनमा सुरु गरेको छ। भरतपुरस्थित गेस्टहाउस चौरमा दिउँसो १ बजे हुने उद्घाटन समारोहसँगै महाधिवेशन औपचारिक रूपमा प्रारम्भ हुनेछ।
महाधिवेशनको उद्घाटन पार्टी सभापति रवि लामिछाने र काठमाडौँ महानगरपालिकाका प्रमुख बालेन्द्र (बालेन) शाहले संयुक्त रूपमा गर्ने तयारी रहेको पार्टी नेताहरूले जनाएका छन्।
सञ्चारकर्मबाट राजनीतिमा आएका लामिछानेले २०७९ असार ७ गते काठमाडौँमा रास्वपा गठनको घोषणा गरेका थिए। छोटो समयमै पार्टीले उल्लेखनीय जनसमर्थन हासिल गर्दै राष्ट्रिय राजनीतिक शक्तिका रूपमा स्थापित भएको रास्वपाको दाबी छ।
गत प्रतिनिधि सभा निर्वाचनमा रास्वपाले ११ लाखभन्दा बढी मतसहित २० सिट जित्दै संसदमा प्रवेश गरेको थियो। हाल पार्टीले प्रत्यक्ष र समानुपातिक गरी १८ देखि २० सिट हाराहारी प्रतिनिधित्व गरिरहेको छ।
महाधिवेशनमा देशभरबाट करिब चार हजार प्रतिनिधि सहभागी हुने जनाइएको छ। पार्टीले यस महाधिवेशनमार्फत संगठनात्मक पुनर्संरचना, नेतृत्व चयन तथा आगामी राजनीतिक कार्यदिशा तय गर्ने लक्ष्य राखेको छ।
शनिबार बसेको केन्द्रीय समितिको अन्तिम बैठकले संशोधित विधान अनुमोदन गर्दै १५१ सदस्यीय केन्द्रीय समिति संरचना प्रस्ताव गरेको छ। नयाँ व्यवस्थाअनुसार १९ पदाधिकारी रहनेछन् भने प्रदेश सभापतिहरू पदेन सदस्य हुनेछन्। सभापतिलाई ५१ सदस्य मनोनयन गर्ने अधिकार रहने व्यवस्था गरिएको छ भने बाँकी १०० सदस्य निर्वाचन प्रक्रियाबाट चयन हुनेछन्।
केन्द्रीय निर्वाचन आयोगले महाधिवेशनको कार्यतालिका सार्वजनिक गरिसकेको छ। सभापति, पदाधिकारी तथा केन्द्रीय सदस्यका उम्मेदवारका लागि दस्तुर र समर्थक संख्या पनि तोकिएको छ।
पार्टीले संगठन विस्तारलाई प्राथमिकता दिँदै टोलस्तरदेखि संरचना विस्तार गर्ने नीति लिएको जनाएको छ। सहमहामन्त्री विपिन आचार्यका अनुसार यसपटक विदेशी राजनीतिक दल वा प्रतिनिधिलाई भौतिक रूपमा आमन्त्रण गरिएको छैन, तर शुभकामना सन्देश आदानप्रदान गरिएको छ।
रास्वपाको महाधिवेशनलाई पार्टीले आफ्नो राजनीतिक यात्राको नयाँ चरणका रूपमा लिएको छ, जसले संगठन सुदृढीकरण र भावी रणनीति तय गर्ने अपेक्षा गरिएको छ।
पार्टी स्थापनाकालदेखि नै विभिन्न विवाद, राजनीतिक उतारचढाव र मुद्दा–मामिलाबीच अघि बढ्दै आएको रास्वपा अहिले प्रमुख वैकल्पिक राजनीतिक शक्तिका रूपमा आफूलाई स्थापित गर्ने प्रयासमा रहेको विश्लेषण गरिएको छ।
क्याटेगोरी : राजनीति
प्रतिक्रिया