काठमाडौं । फिफा विश्वकप २०२६ अन्तर्गत राउन्ड अफ–१६ मा स्पेनले पोर्चुगललाई १–० ले पराजित गर्दै १६ वर्षपछि क्वाटरफाइनलमा स्थान बनाएको छ। अमेरिकाको डलासमा सोमबार राति भएको प्रतिस्पर्धात्मक खेलमा इन्जुरी समयमा गरिएको एकमात्र गोल निर्णायक बन्यो।
निर्धारित ९० मिनेटसम्म दुवै टोलीले गोल गर्न नसकेपछि खेल अतिरिक्त समयतर्फ जाने अनुमान गरिएको थियो। तर दोस्रो हाफको इन्जुरी समयमा मिकेल मेरिनोले उत्कृष्ट गोल गर्दै स्पेनलाई अन्तिम आठमा पुर्याए।स्पेनले सन् २०१० मा विश्वकप जितेपछि पहिलो पटक प्रतियोगिताको क्वाटरफाइनलमा स्थान बनाउन सफल भएको हो। त्यसयता टोलीले विश्वकपमा अन्तिम आठको यात्रा तय गर्न सकेको थिएन।
विश्वकपमा रोनाल्डोको अन्तिम खेल
यस हारसँगै पोर्चुगलका कप्तान क्रिस्टियानो रोनाल्डोको विश्वकप यात्रा पनि टुंगिएको छ। ४१ वर्षीय रोनाल्डोले खेलपछि यो आफ्नो अन्तिम विश्वकप भएको पुष्टि गर्दै प्रतियोगिताबाट भावुक बिदाइ लिए।
उनले पत्रकारसँग भने, “यसरी विश्वकपबाट बाहिरिनु दुःखद हो। मैले आफ्नो तर्फबाट सबैथोक दिएँ। यो मेरो अन्तिम विश्वकप थियो, तर अन्तर्राष्ट्रिय फुटबलबाट संन्यास लिने विषयमा अहिले नै निर्णय गर्ने छैन।”
रोनाल्डोका ऐतिहासिक कीर्तिमान
विश्वकप उपाधि जित्न नसके पनि रोनाल्डोले प्रतियोगितामा थुप्रै ऐतिहासिक उपलब्धि आफ्नो नाममा दर्ज गरेका छन्।जारी विश्वकपमा उज्वेकिस्तानविरुद्ध दुई गोल गरेसँगै उनी लगातार ६ फरक विश्वकप (२००६, २०१०, २०१४, २०१८, २०२२ र २०२६) मा गोल गर्ने विश्वकै पहिलो खेलाडी बने।
उनले पोर्चुगलका लागि सर्वाधिक २७ विश्वकप खेल खेल्दै ११ गोल गरेका छन्। यसै विश्वकपमा क्रोएसियाविरुद्ध गोल गर्दै ४१ वर्ष १४७ दिनको उमेरमा विश्वकपको नकआउट चरणमा गोल गर्ने सबैभन्दा पाका खेलाडीको कीर्तिमान पनि बनाए। समग्र विश्वकप इतिहासमा भने उनी क्यामरुनका रोजर मिलापछि दोस्रो पाका गोलकर्ता हुन्।
प्रशिक्षक मार्टिनेजको राजीनामा
पोर्चुगल विश्वकपबाट बाहिरिएसँगै मुख्य प्रशिक्षक रोबर्टो मार्टिनेजले पदबाट राजीनामा दिएका छन्। उनले स्पेनसँगको हारलाई पोर्चुगिज फुटबलको एउटा स्वर्णिम युगको अन्त्यको संकेतका रूपमा व्याख्या गरेका छन्।
विश्वकप यात्रा समाप्त भए पनि रोनाल्डोले क्लब फुटबलमा भने साउदी प्रो लिगको अल–नास्रबाट आफ्नो व्यावसायिक करिअरलाई निरन्तरता दिने अपेक्षा गरिएको छ।
क्याटेगोरी : खेलकुद
प्रतिक्रिया