फिफा विश्वकप २०२६: खेलसँगै संगीत, ग्ल्यामर र सांस्कृतिक उत्सवको विश्वव्यापी महाकुम्भ
काठमाडौं । विश्व फुटबलको सबैभन्दा प्रतिष्ठित प्रतियोगिता फिफा विश्वकप २०२६ यसपटक नयाँ इतिहास रच्दै उत्तर अमेरिकाका तीन राष्ट्र—अमेरिका, क्यानडा र मेक्सिकोको संयुक्त आयोजनामा सुरु हुँदैछ। पहिलोपटक ४८ राष्ट्रको सहभागिता रहने यो विश्वकप केवल फुटबल प्रतिस्पर्धामा सीमित नभई संगीत, मनोरञ्जन, संस्कृति र ग्ल्यामरको विश्वव्यापी उत्सवका रूपमा प्रस्तुत हुने भएको छ।
फिफाले विस्तार गरेको नयाँ ढाँचाअनुसार यस संस्करणमा सहभागी टोलीको संख्या बढेसँगै खेलहरूको संख्या र प्रतिस्पर्धात्मकता पनि उल्लेखनीय रूपमा वृद्धि हुनेछ। प्रतियोगिता तीन देशका १६ आधुनिक सहरमा आयोजना हुँदैछ।
उद्घाटन समारोहलाई पनि विशेष महत्व दिइएको छ। आयोजक तीनै राष्ट्रमा छुट्टाछुट्टै भव्य कार्यक्रममार्फत विश्वकपको औपचारिक सुरुवात गरिनेछ।
विश्वकपको पहिलो उद्घाटन समारोह मेक्सिको सिटीस्थित ऐतिहासिक एज्टेका स्टेडियममा आयोजना हुनेछ। दुई पटक विश्वकप फाइनलको साक्षी बनिसकेको यस मैदानमा सन् २०१० को चर्चित विश्वकप गीत ‘वाका वाका’बाट विश्वभर लोकप्रिय बनेकी कोलम्बियाली गायिका साकिरा मुख्य आकर्षणका रूपमा रहनेछिन्।
उनसँगै जे बाल्विन, रयान कास्त्रो तथा मेक्सिकोका चर्चित स्थानीय कलाकारहरूले सांगीतिक प्रस्तुति दिने कार्यक्रम छ। त्यस्तै, मेक्सिकन-अमेरिकी अभिनेत्री सलमा हायेकले विश्वभरबाट आएका फुटबल समर्थकलाई स्वागत गर्दै खेलकुदमार्फत एकता र सहकार्यको सन्देश दिनेछिन्।
मेक्सिकोको कार्यक्रम सम्पन्न भएपछि अमेरिकाको लस एन्जलसस्थित सोफी स्टेडियममा अर्को भव्य उद्घाटन समारोह हुनेछ। करिब ९० मिनेट लामो उक्त कार्यक्रममा क्याटी पेरी, अनित्ता, ब्ल्याकपिंककी लिसा, नाइजेरियन कलाकार रेमा तथा दक्षिण अफ्रिकी गायिका टाइला लगायतका अन्तर्राष्ट्रिय स्टारहरूले प्रस्तुति दिनेछन्।
फिफा अध्यक्ष जियानी इन्फान्टिनोका अनुसार अमेरिकी समारोहले बहुसांस्कृतिक समाज, आप्रवासी समुदायको योगदान र संगीतको विश्वव्यापी प्रभावलाई केन्द्रमा राख्नेछ।
यसैबीच क्यानडाको टोरन्टोमा आयोजना हुने समारोह दक्षिण एसियाली दर्शकमाझ विशेष आकर्षणको केन्द्र बन्ने अपेक्षा गरिएको छ। बलिउड अभिनेत्री तथा नृत्यांगना नोरा फतेहीले आफ्नो चर्चित प्रस्तुति मार्फत रंग जमाउनेछिन्।
कतार विश्वकप २०२२ को आधिकारिक गीतमा समेत सहभागी रहेकी नोराले यसपटक एसियाली तथा बलिउड मनोरञ्जन जगतको प्रतिनिधित्व गर्नेछिन्। कार्यक्रममा अलानिस मोरिसेट, एलेस्सिया कारा, माइकल बब्ले र विलियम प्रिन्सलगायत क्यानडाली कलाकारहरूको पनि प्रस्तुति रहनेछ।
भव्य उद्घाटन कार्यक्रमसँगै मैदानमा भने विश्वकपको पहिलो खेल आयोजक मेक्सिको र दक्षिण अफ्रिकाबीच एज्टेका स्टेडियममै हुनेछ। समूह ‘ए’ अन्तर्गतको यस खेललाई दुवै टोलीका लागि महत्वपूर्ण प्रतिस्पर्धाका रूपमा हेरिएको छ।
खेलअघि मेक्सिकोका चर्चित गायक अलेजान्द्रो फर्नान्डेजले घरेलु टोलीको राष्ट्रगान प्रस्तुत गर्नेछन् भने दक्षिण अफ्रिकाको राष्ट्रगान गायिका टाइलाले गाउने कार्यक्रम तय गरिएको छ।
समूह ‘ए’ कै अर्को खेलमा युरोपेली टोली चेक गणतन्त्र र एसियाली शक्ति दक्षिण कोरिया आमनेसामने हुनेछन्। अमेरिकी मेजर लिग सकर (एमएलएस) मा खेलिरहेका दक्षिण कोरियाली कप्तान सन ह्युङ मिनको उपस्थितिका कारण यस खेलले पनि विशेष चर्चा पाएको छ।
३६ दिनसम्म चल्ने विश्व फुटबलको यो महाउत्सवको फाइनल खेल जुलाईमा अमेरिकाको न्यु जर्सीस्थित मेटलाइफ स्टेडियममा आयोजना हुनेछ, जहाँ नयाँ विश्वविजेताको टुंगो लाग्नेछ।
क्याटेगोरी : खेलकुद
प्रतिक्रिया