धनगढी । नेपाली कांग्रेस सुदूरपश्चिम प्रदेश संसदीय दलभित्र देखिएको शक्ति संघर्षका बीच मुख्यमन्त्री कमलबहादुर शाह तत्कालका लागि राजनीतिक संकटबाट बाहिरिएका छन्।
मुख्यमन्त्री शाहलाई संसदीय दलको नेताबाट हटाउने उद्देश्यसहित दर्ता गरिएको अविश्वास प्रस्तावमा हस्ताक्षर गरेकी प्रदेश सभा सदस्य डम्मरी महराले आफ्नो समर्थन फिर्ता लिएपछि विद्रोही पक्ष कमजोर बनेको हो।
हस्ताक्षर फिर्ता लिने निर्णयबारे प्रतिक्रिया दिँदै सांसद महराले वर्तमान अवस्थामा नेतृत्व परिवर्तनभन्दा पार्टीको एकता, स्थायित्व र आगामी बजेट निर्माण प्रक्रियालाई प्राथमिकता दिनुपर्ने आवश्यकता रहेको बताइन्। उनले यही कारणले अविश्वास प्रस्तावबाट आफू पछि हटेको स्पष्ट पारिन्।
यसअघि कांग्रेसभित्र असन्तुष्ट समूहले प्रदेश सभा सदस्य दिवानसिंह विष्टको नेतृत्वमा मुख्यमन्त्री शाहविरुद्ध अविश्वास प्रस्ताव दर्ता गरेको थियो। उक्त प्रस्तावमा नौ जना सांसदको समर्थन रहेको दाबी गरिएको थियो।
तर एक सांसदले समर्थन फिर्ता लिएसँगै अविश्वास प्रस्ताव अघि बढाउन आवश्यक बल विद्रोही पक्षले गुमाएको छ। यससँगै मुख्यमन्त्री शाहले संसदीय दलको नेता र प्रदेश सरकारको नेतृत्व दुवैमा आफ्नो पकड कायम राख्न सफल भएका छन्।
क्याटेगोरी : राजनीति
प्रतिक्रिया